Lhao nau'' d-yaug ra'' qo lhe'' ( A message to pan Lhaovo)

Ana'' au boe'' na ra'' gin khyo; we' cao'' mung yang: Lhao nau'' d-yaug kaid' ca'' , myid ca'' nae'' ra'' akhyo wa

1. Lhao myen'' re gai; boe'' gu mae'' jhau nae''

2. Lhao tung'' ce' re gai; boe'' gu mae'' ci nae'' , tung'' nae'' , nghae' nae''

3. Lhaovo yao; cao gai; boe'' gu mae'' thaug' qhao yang: zam'' khug nae''

4. Lhaovo ma'' qho' myid bo nae'', Lhaovo sam'' ve, re tau; to' nae'' dao; ka'' Lhao thaung a vin nae''

5. Lhaovo mao; nhaung yao; cao byin qham , dang; qhan khyo re thaug' qhao na nae''

6. Yham sang; ra'' byumyu'' qi; qhang khyo mae gai; boe'' gu'' mae'' bao'' thaug' nae''

7. Phung: , jo, qo na jao; we' mau'' zo'' phaji'' azhao'' m-kho' loza: mao; nhaung myid bo taung'' na; ye'' lo'' re d-ba tho' d-ba Lhaovo byumyu'' ga; yang qi; qhang lo'' nae'' ngaid.

Mo''so re lam khug ra'' byumyu'' ngaid' we' d-khyo; Mo''so jhao'' qam; o: mho' jhaung: mho' mung: ceim'' tau; to' mung bao kyi ra'' byumyu boe'' doe, ye'' lo'' gelang; o''.

naonhaung'' alhap' re jhid' de, ra''
lhao nau''

Yangon Lhaovo Christian Fellowship

Yangon vomo'' mae joe'' na ra'' lhao nau'' jham ra'' pa'' caung ,zam'' khug phaung adai; ato, re lho'' d-khye' shid' lhang: khyo'' mung kaid' na ra'' ga'' ru qo'' gyo'' ra''. Lho'' khye' ra'' sao qhid' khyaug' ba: ba we' lo'' thao'' ra'' khyaug' ba: ba re kaid' na ra''.

Lhao nau'' jham m-laug m-mhyo; ngaid m-se'' mo''so mae dang qhan'' ru we' sosuna mau'' zo'' mae ceim'' thaug' qhao na bam ge-lang: o''.

Blog Asag' mae'' tug' yu ra''

Jhid' de, ra'' mao; nhaung lhao nau'' jham re c-ra'' lhaovo blog asag' mae'' ngaui bau'' ru we' tug' yu ra''.

Nyhao; mho' lhaovo tung'' ce' khyo'' internet mae qu'' nae'' akhyo'' pe'' m-lam'' jo, shi'' ru re the' myao ra'' ai mung: , ngo d-yaug khyo'' mae'' gai; boe'' gu re thaug' qhao yang: tung'' na ru ngaid.

Jap byang'' ra'' khyo , man qi'' ra'' khyo wa pe'' m-jo, nae'' , ngaid m-se'' jhid' de, ra'' lhaovo jham alhap' qhid' mae'' ngaid ve-shao: ein ru ngaid. Cara'' tung'' khye' tung'' so: pe'' re qo'' nghe' mung: d-ja; ja: ta'' nug pyang nug ngaid re xo' taui'' lo gala, ein; re qam; lao'' ke' nug ra''.

Myid gye, jo, qo khao; ngo'' mae joe'' pyo; na; bam; ra'' Lhaonau'' jham d-yaug we' d-yaug email khyo'' qo'' xo' taui mung: Jhaung: jho'' mho' bao'' qo'' nae'', axo' ataui; qo'' mung: Mo''so mau'' zo'' , byu myu'' mau'' zo'' we' kao daui su-na su-ye, khyo mae qo'' jho'' khug ngha; ye'' lo'' nae'' akhyo boe'' doe, veshao: ein myid nghae'' tau'' yaung ru ngaid o''.

naonhaung'' alhap' ra'',

lhao nau''